Muqdishu,(insidesomalia.org)-Meydka Allaha u naxariistee Cabdalla Nuuradiin Axmed oo ahaa Abwaan soomaaliyed, isla markaana ka mid ahaa Suxufiyiinta Soomaaliyed ayaa saaka lagu wadaa in lagu aaso Magaalada Muqdisho.

Marxuum Cabdalla oo mudadii u dambeysay xanuunsanaa ayaa shalay u geeriyooday xanuunka wadnaha, kadib markii uu wadnaha uu ku istaagay agagaarka Beexaani, goob uu inta badan fariisin jiray.

Gabar la dhalatay Marxuum Cabdalla Nuuradiin oo lagu magacaabo Samiira Nuuradiin ayaa ka sheekeysay taariikhda walaalkeed oo ay sheegtay in ay ka weyn tahay, iyadoona ay Cabdalla sheegtay inuu ku dhashay Magaalada Jig Jiga ee ismaamulka Soomaalida Ethiopia, iyadoona sheegtay in xilligaas kadib uu Cabdalla ku soo koray Muqdisho ilaa waxbarashadiisa.

Mas'uuliyiin, saxafiyiin iyo abwaano ayaa aad uga naxay geerida deg dega aheyd ee ku timid Marxuumka Cabdalla Nuuradiin, waxaana aaskiisa la filayaa in ay maanta ka qeyb gasho qeybaha kala duwan ee bulshada Soomaaliyed.

Ra'iisul Wasaare Kuxigeenka ahna wasiirka Warfaafinta Isboortiga iyo dhalinyarada Axmed Cabdisalaan ayaa tacsi u diray qoyskii uu ka geeriyooday, wuxuuna intaa ku daray in Cabdalla uu ahaa nin wanaagsan oo bulshada wax u taraya, isagoo fikradiisa ku cabirayay buu yiri xaaladaha dalka ka jiray mudadii bur burka.

Marxuum Cabdalla Nuuradiin wuxuu xilligii Dowladii hore ka soo shaqeeyay Raadiyihii Qaranka ee Muqdisho, iyo Golihii Murtida iyo Madadaalada, xilligaasoo uu ku soo bandhigay ruwaayado uu hal abuur ka ahaa iyo kuwa uu daadihin jiray, waxaana uu kaloo alifay heeso kala duwan oo ay ku luuqeen dhowr Fanaan oo aad looga yaqaano Soomaaliya